အပြန်

January 23, 2009 at 7:39 am (အပြန်)

အပြန်

မျှော်လင့်စက်ဝိုင်း
တစ်ပတ်ပြန်လည်တိုင်း
မီးစာတွေတင်ခဲ့ကြတယ်…..
ထမ်းပိုးထားတဲ့
မနက်ဖြန်ရဲ့လက်ထဲမှာ
ကိုယ့်နှလုံးသားကိုယ်
အရောင်ပြန်ဆိုးခဲ့ကြတယ်…..
ရင်းနှီးထားတဲ့
အမဲစက်တွေနဲ့ညကို
တစစီ မြှုပ်နှံအပြီးမှာ….
အသနားခံစာတွေနဲ့
တုပ်နှောင်ထားတဲ့ မျက်လုံးတွေကို
ခဏတဖြုတ်ပိတ်လိုက်တယ်…
ချုပ်ရိုးရာတင်းကြမ်းနဲ့
အမာရွတ်တွေ အောက်မှာတော့
ပြဿဒါးနေ့တွေ ဖရိုဖရဲ…..
နောက်ဆုံးပိတ်မှာ
အိတ်နဲ့မလွယ်ခဲ့ရပေမယ့်
လက်တဆုပ်စာလောက်တော့
ပြန်ပေးရလိမ့်မယ်….။ ။

နွေသူရ
၂၆၊၁၀၊၂၀၀၂

(ပြည်တော်ပြန်ဖို့ပြင်ဆင်နေတဲ့အခိုက်မှာ….ဒီကဗျာလေးကိုအမှတ်ရစွာနဲ့ပြန်တင်ပေးလိုက်ပါတယ်…)

6 Comments

ပူနွေးလာသောကမ္ဘာကြီးထဲမှာ…

January 20, 2009 at 5:26 pm (ပူနွေးလာသောကမ္ဘာကြီးထဲမှာ...)

ပူနွေးလာသော ကမ္ဘာကြီးထဲမှာ….

ပူနွေးလာသော ကမ္ဘာကြီးထဲမှာ
ဖီးနစ်ငှက်ဟာ အတောင်ပံတွေတဖျပ်ဖျပ်…..
အနာဂါတ်ကျိုးပဲ့နေသော သံလမ်းတလျှောက်
ငြိမ်းချမ်းရေးရထားတွေ တစ်စီးပြီးတစ်စီး….
ခ၀ါချခဲ့ရတဲ့ စစ်မက်မြေအတွင်းထဲ
အဏုမြူတွေ၊
အကြမ်းဖက်တွေ၊
မျိုချမရတဲ့ အာဎာာတတွေ
တစ်ခုပြီးတစ်ခု
တစ်မျိုးပြီးတစ်မျိုး…..
ခုခံထားတဲ့ အကြောင်းပြချက်တွေနဲ့ပဲ
ပင်လယ်လှိုင်းတွေဟာ တရိပ်ရိပ်….
သန်းပေါင်းများစွာထဲမှာ
ကိုယ်ကိုယ်တိုင်က
သမင်ဖြစ်လိုက်
ကျားဖြစ်လိုက်….
အသုံးမကျမှုတွေစုပုံထားတဲ့ ဦးခေါင်းခွံ ခပ်သေးသေးထဲမှာ
တံခါးမရှိ ဓါးမရှိလောဘတွေ တလဟော….
အဲဒီလိုပူနွေးလာသောကမ္ဘာကြီးထဲမှာ
ဖီးနစ်ငှက်ဟာ အတောင်ပံတွေတဖျပ်ဖျပ်….။ ။

နွေသူရ
၀၉၊၂၀၀၂


( ရေးထားတာတော်တော်ကြာပါပြီ….ရေးစတုန်းကတော့ ပျံသန်းခြင်း ၂၂ လို့ပေးခဲ့ပါတယ်။
ခုမှတဖန်ခေါင်းစဉ်ပြောင်းလိုက်တာပါ…။ ကဗျာရေးဖော်သူငယ်ချင်းတစ်ချို့ကတော့
ဒီကဗျာပုံစံကြီးကိုမကြိုက်ဘူးလို့ ပြောဖူးပါတယ်…။ ဘလော့ဂါ ညီအကိုမောင်နှမတွေလည်း
ဖတ်ပြီးရင် စိတ်ထဲရှိသလို အားမနာတမ်းဝေဖန်ပေးသွားနိုင်ပါတယ်…။ )

6 Comments

စီးမျောခြင်းသံစဉ်

January 17, 2009 at 9:55 am (စီးမျောခြင်းသံစဉ်)

စီးမျောခြင်းသံစဉ်

လူတစ်စုရဲ့အပူက လူတစ်စုကိုလာဟပ်တယ်
ငါ့ကိုယ်ပေါ်မှာ မီးတောက်တွေ တဖွားဖွား
ငါ့သွေးထဲမှာ မီးပွားတွေတလွင့်လွင့်

ခေတ်တစ်ခုရဲ့ အရှိန်ထဲမှာ ငါတို့မျောခဲ့ကြ
တကယ်တမ်းပြောရရင်
ငါတို့ကိုယ်ငါတို့ မျှောခဲ့ကြ
သမိုင်းအပြောင်းမှာသူရဲကောင်းတွေ ပေါ်လာမှာပဲ
သက်ကြီးစကားသက်ငယ်ကြားကတည်းက
ငါတို့သမိုင်းနံရံမှာတော့ အမှားတွေအထပ်ထပ် ရေးဖြစ်ခဲ့ပြီ
စင်ပေါ်တက်ချိန်မှာ
စင်အောက်ကမျက်နှာချိုသလား၊ ခါးသလား
၁၀ နှစ်ကျော်စွဲကပ်ခဲ့တဲ့ ကြပ်ခိုးတွေဟာ
ခေါင်းထဲမှာ ပြည့်ကြပ်ကုန်ပြီ
ဒီလက်တွေနဲ့ ဒီလက်တွေကိုကမ်းခဲ့ကြ
ပြီးတော့ ဒီလက်တွေနဲ့ပဲ ၀ါးကူထိုးခဲ့
အဖတ်ဆယ်မရတော့တဲ့ ဒီတွင်းနက်တွေထဲမှာ
ဦးနှောက်တွေလည်းယိုစီးကျပေါ့
စီးမျောပြီးရင်းစီးမျောခဲ့တာ
ဇာတ်သိမ်းခန်းရောက်မှ ပိုးဖလံတွေဖြစ်မှန်းသိရတော့တယ်
မီးတောက်တွေကတော့ အခုထိလှပနေတုန်းပဲ…….။

နွေသူရ
၀၆၊၀၁၊၂၀၀၉

14 Comments

နွေသူရသို့ …အိတ်ဖွင့်ပေးစာ

January 9, 2009 at 10:17 pm (နွေသူရသို့ ...အိတ်ဖွင့်ပေးစာ)

နွေသူရသို့….အိတ်ဖွင့်ပေးစာ

 

ဘ၀ကနက်လာလေလေ

အိမ်ပြန်တံခါးဝတွေ  ပိုကျဉ်းသွားလေလေ

တိုးရင်းဝှေ့ရင်းနဲ့ပဲ

အလျင်းသင့်သလို ဖြတ်သန်းခဲ့ကြ

တိုးရင်းဝှေ့ရင်းနဲ့ပဲ

ပြီးဆုံးကြောင်း ကြေညာခဲ့ကြ

၉၈ ကနေ ၂၀၀၈

ဘာတွေဘယ်လောက်ချန်ထားရစ်ခဲ့

မင်းလေထုဟာသန့်စင်ရဲ့လား

မင်း ကဗျာတွေကရော အဆိပ်တောက်ကင်းစင်ရဲ့လား

မင်းဟာ  မင်းနေရာနဲ့ရောတန်ရဲ့လား

………………………………

……………………………….

………………………………….

…………………………………

မနေ့ကလမ်းတွေက ပိုကျဉ်းသွားပေမယ့်

မနေ့ကမျက်စိတွေက ပိုကျယ်လာနိုင်ပါ့မလား

မနေ့တုန်းကမင်းကရော မာန်မာနကင်းရဲ့လား 

၂၀၀၉ ရဲ့အက်ကြောင်းတိုင်းမှာ

ဘ၀က  ပိုပိုပြီးစေးပစ်လာနိုင်သလား

ရန်သူတွေက  ပိုပိုပြီးအေးစက်လာနိုင်သလား

သမားရိုးကျ အိမ်ပြန်ညတွေကရော

အရင်လိုနွေးထွေးပါ့ဦးမလား   ။     ။

 

နွေသူရ

၀၇၊၀၁၊၂၀၀၉

 

 

 

13 Comments

အဝေးမြို့

January 6, 2009 at 8:04 pm (အဝေးမြို့)

အဝေးမြို့

 

ငြီးငွေ့ခြင်းမရှိပါဘူး

အဲဒီနေ့တွေဖြတ်သန်းခဲ့ရတာ

အတောင်ပံတွေကျိုးပဲ့သည်အထိ

ခရီးတစ်ခုပေါက် ပေါက်ခဲ့ကြပြီပဲ…….။

 

ပင်လယ်ကအစ ကောင်းကင်အဆုံး

လက်ထဲမှာလည်း အမုန်းအချစ်ရောထွေးလျက်ပေါ့

ညနက်နက်တွေထဲက တိုးထွက်ကြရင်း

မိတ်ရင်းတချို့လည်းကျန်ခဲ့ပြီ……..။

 

အရှုံးတွေအိတ်သွန်ဖာမှောက်လို့

နှလုံးသားတွေ ပြတင်းပေါက်ဖွင့်ချိန်မှာတော့

ညနေဟာသဂြိုဟ်ဖို့ပြင်နေပြီ…..။

 

ဆုံးရှုံးဖူးတာတစ်ခုမကမို့

ဘယ်သူမှ  မျက်ရည်မကျခဲ့ကြဘူး

လမ်းခွဲမှာ  လက်တွဲဖြုတ်ရသလို

အလွမ်းတွေဟာ အိုတယ်လို့မရှိပါဘူး….။


ပြန်ရောက်ခဲ့ချိန်မှာ…

လမ်းတွေဟာကြိုနေမယ်

ညတွေဟာကြိုနေမယ်

အားလုံးဟာနုပျိုမြဲပဲ…..။

 

ဒါဏ်ရာတွေ   ပြန်တူးဆွတာတောင်မှ

အဝေးမြို့ဟာ     အေးခဲမှာမဟုတ်သေးပါဘူး…..။      ။

 

နွေသူရ

၁၁၊၂၀၀၁

 

 

9 Comments

တက်ဂ်ပို့စ်

January 5, 2009 at 3:43 pm (ပြန်ဆုံချိန်)

တက်ဂ်ကြွေးတစ်ခုတင်နေလို့ ဘာရေးရမှန်းမသိဘူးဖြစ်နေပါတယ်။စိတ်ကူးယဉ်ခြင်းဆိုတော့

ခေါင်းစဉ်ကလွယ်သလိုလိုရှိပေမယ့် စဉ်းစားရခက်နေပါတယ်။ဘ၀မှာစိတ်ကူးယဉ်ခဲ့တာတွေကလည်းတော်တော်များခဲ့တာကိုး။အသက်အရွယ်၊အခြေနေအချိန်အခါပေါ်လည်းမူတည်သေးတာကိုးဗျ။တစ်နေ့ကဒိုင်ယာရီအဟောင်းထဲမှာ
စိတ်ကူးယဉ်ရေးထားတဲ့ကဗျာလေးတစ်ပုဒ်တွေ့လို့ ဆားချက်လိုက်ပါတယ်။(တကယ်လည်းဖြစ်ချင်တဲ့စိတ်ကူးလေးပါ:P….။)
ဆိုင်လားမဆိုင်လားတော့မသိဘူး။ဒီကဗျာလေးနဲ့ပဲအကြွေးဆပ်လိုက်ပြီ မယ်ဂုမိ  ရေ…..။

ပြန်ဆုံချိန်

 

ပြန်ဆုံချိန်မှာ….

နှစ်ဦးသားရင်ခုန်သံတွေနဲ့ ဖွဲ့စည်းထားတဲ့

ကဗျာလေးတချို့အသက်ဝင်လာလိမ့်မယ်။

စိတ်ကူးယဉ်ထားတဲ့တေးသံတွေ

နှလုံးသားအထိလွင့်ပျံ့လာလိမ့်မယ်။

 

ပြန်ဆုံချိန်မှာ….

အိပ်မက်ထဲကအလွမ်းတွေ

မိုးစက်တွေအဖြစ် ကောင်းချီးပေးလိမ့်မယ်။

ပြီးတော့

အမောပြေ  နှုတ်ဆက်အနမ်းလေးတွေ

အလွမ်းပြေ  ဓါတ်ပုံအဟောင်းလေးတွေ

ရှင်သန်နိုးထလာလိမ့်မယ်။

 

ပြန်ဆုံချိန်မှာ….

အထပ်ထပ်ရစ်ပတ်ခဲ့တဲ့ကြိုးတွေနဲ့

နားလည်မှုတွဲလက်တွေကိုချိတ်လို့

အိုအေစစ်သွားတဲ့လမ်းကို

အတူလျှောက်လှမ်းကြမယ်……။       ။

 

နွေသူရ

၂၉၊၀၅၊၂၀၀၈

6 Comments

အိပ်တန်းပြန်ငှက်များ၏ဒိုင်ယာရီ

January 3, 2009 at 12:33 pm (အိပ်တန်းပြန်ငှက်များ၏ဒိုင်ယာရီ)

အိပ်တန်းပြန်ငှက်များ၏  ဒိုင်ယာရီ

 

စွန့်စွန့်စားစား

ခရီးသွားငှက်တွေပါ…..

မနေ့ကရာသီတွေလိုပဲ

သမားရိုးကျနေတတ်ခဲ့ပါပြီ…..။

 

ကံကြမ္မာရဲ့  ကြံရာပါဆွဲချက်တွေနဲ့လည်း

မျက်လုံးစုံမှိတ် တိတ်တိတ်နေတတ်ခဲ့ပါပြီ…..။

 

ဦးတည်ရာမဲ့လမ်းတွေထက်မှာတော့

ဗလာသက်သက်နဲ့ စုတ်ချက်ကြမ်းတွေပဲ ရရှိခဲ့တယ်…။

 

ဒီရေကိုကျော်ဖြတ်

မုန်တိုင်းလွတ်မယ့်အရပ်ဟာ မျှော်လင့်ချက်တွေနဲ့ပေါ့….

လရောင်ငတ်တဲ့ညတွေတိုင်းမှာ

မိုးစက်တွေက ကဗျာမဆန်ခဲ့ဘူး….

ရေလှိုင်းတွေဟာလည်း ကဗျာမဆန်ခဲ့ဘူး…

ရူးရူးမူးမူး တိုးထွက်ခဲ့ရပေမယ့်

နှလုံးသားတွေ မရဲရင့်ခဲ့ကြဘူး….။

 

မိသားစု

ဘ၀

စားဝတ်နေရေး

အရာအားလုံးအတွက် စတေးခဲ့ရတဲ့လက်တွေထဲမှာ

သိက္ခာတွေ မပုပ်သိုးခဲ့ဘူး…

ကိုယ့်လိပ်ပြာကိုယ် အရောင်မဆိုးခဲ့ပါဘူး…..။

 

ရင်နာစရာတွေက စားမြုံပြန်ဖို့လွယ်ပေမယ့်

ရင်နင့်စရာ အမာရွတ်တွေကတော့

အခုထိ ထင်ကျန်နေတုန်း ပဲ ……။

 

လေဟုန်မှာ  ၀ဲခဲ့ရပေမယ့်

ဆုတ်ပြဲခဲ့တဲ့ ဒီအတောင်ပံတွေကိုတော့

ဘယ်သူကများ  စာနာနိုင်ခဲ့လို့လဲ….။ 

          

အရှုံးမပေးဘူးလို့ ရူးလောက်အောင်အော်ဟစ်နေလည်း

မျှော်လင့်ချက်ရင်ခွင်တခြမ်းကတော့ မီးကြွမ်းခံခဲ့ရပြီးပြီလေ….။      ။

 

 နွေသူရ

၁၆၊၁၀၊၂၀၀၇

9 Comments

အချစ်ဆိုသည်မှာ

December 28, 2008 at 3:13 pm (tag post)

ဒုတိယအကြိမ် တက်ဂ်ခံရတဲ့ပို့စ်လေးပါပဲ။ကိုရဲရင့်နီ က အကြွေးအတင်းတောင်းနေလို့ပါ။မချင်းမလေးလည်း

အရင်ကတက်ဂ်ထားခဲ့ဖူးပါတယ်။ ရေးလည်းရေးဖူးပါတယ်။
ခေါင်းစဉ်က အချစ်ဆိုသည်မှာတဲ့…..။ စဉ်းစားရအင်မတန်ကြပ်တဲ့ခေါင်းစဉ်ပါ။
ကိုရဲကြီးကခင်လို့တက်ဂ်တော့လည်း ထပ်ရေးပေးလိုက်ပါတယ်..။
စာတစ်တန်ပေတစ်တန်မရေးတတ်လို့ ဒီကဗျာလေးနဲ့ပဲကျေနပ်ပေးဖို့တောင်းဆိုပါတယ်ကိုရဲကြီးရေ…။
အကြွေးကျေပါတယ်နော်…။

အချစ်ဆိုသည်မှာ…
မျှော်လင့်ခြင်းရဲ့တေးသံ
ထို့ထက်ပိုရသော်
ကမ္ဘာဦးက စီးဆင်းလာတဲ့မြစ်တစ်စင်း
ချစ်ခြင်းရဲ့သင်္ကေတမှာ
အရာအားလုံးဟာ ကြည်နူးလှပနေတယ်….
ညတစ်စင်းမှာ လမင်းကလင်းနေသလိုမျိုး
တချို့က လေညှင်းထက်နူးညံ့တယ်
တချို့က မုန်တိုင်းထက်ကြမ်းတမ်းတယ်…။
နှလုံးသားရေပြင်မှာ
မထင်မှတ်ဘဲ ရိုက်ခတ်ခဲ့သောကြိုးတွေ
အသံမျိုးစုံ၊ အရာင်မျိုးစုံ…
ချစ်ခြင်းအဟုန် လျင်မြန်ပုံက 
ဘာနဲ့မှတားမရ၊ ဆီးမရ..
ဘာပဲဖြစ်ဖြစ်
အချစ်မြစ်ပြင်ထဲမှာ စီးဆင်းပြီးပြီဆိုရင်
ကမ်းမမြင်တဲ့နေ့တွေလည်း ကြုံရဦးမယ်…
လတ်ဆတ်တဲ့ရနံတွေလည်းရှုရဦးမယ်ဆိုတာကတော့
သေချာတယ်…..။       ။

နွေသူရ
၂၈၊၁၂၊၂၀၀၈
ညနေ ၀၆၃၀ တွင်ရေးခဲ့သည်။

13 Comments

နှင်းပျော်ချိန်

December 26, 2008 at 7:43 pm (နှင်းပျော်ချိန်)

နှင်းပျော်ချိန်

 

ဖြူစင်ခဲ့တဲ့ နှင်း…

ခြေရာတွေနင်းဖြတ်ပြီးတဲ့နောက်

အရည်တွေပျော်  အရောင်တွေပျက်..

သဘာဝကပေးတဲ့စုတ်ချက်တွေ

မင်းမှာမရှိတော့ဘူး….

နွေအ၀င်လမ်းမှာဖြတ်သန်းခဲ့တဲ့နေ့တွေက

ကြမ်းလွန်းပါတယ်….

တမျိုးစီလှပေမယ့်

တခြားစီရှိကြတဲ့ သဘာဝတွေကိုတော့

တို့….မလွန်ဆန်နိုင်ခဲ့ကြဘူးလေ….။      ။

 

နွေသူရ

၀၅၊၀၄၊၂၀၀၇.

10 Comments

အ၀ါရောင်လမ်းခွဲ

December 21, 2008 at 11:00 am (အ၀ါရောင်လမ်းခွဲ)

(တင်ပြီးသားလေးပါပဲ…..စာမေးပွဲတစ်ခုပြီးတိုင်းအမှတ်ရနေမိလို့ပါ…)

         အ၀ါရောင်လမ်းခွဲ

 

မြုပ်ချည်ပေါ်ချည်  ဖြတ်သန်းခဲ့ကြသော

ပင်လယ်တစ်ခု….

ပေးဆပ်ခဲ့ရသောနွေနဲ့

ဆုတ်ပြတ်သတ်ခဲ့တဲ့ အိမ်ပြန်ရက်တွေသာ

ငါ့ကိုရူးသွပ်စေခဲ့တယ်….

မျှော်လင့်ခြင်းနေ  ၀င်ခဲ့ပြီးနောက်

ခွဲဖြုတ်ခဲ့ကြသောလက်တွေ

ကျွမ်းရစ်ခဲ့ကြသောဘ၀တွေ

တစစီ..

တစစီ..

ဟိုးအဝေးဆုံးဆီထိ

ငါတို့လွင့်ခဲ့ကြတယ်…

ပြန်မရနိုင်တော့တဲ့  ဘ၀ရဲ့လက်ထဲကနေ

မရိုးနိုင်တဲ့ဆားငံရေတွေ  သောက်မိတုန်းပဲ…

ပြာဖြစ်ပြီးတဲ့နောက်တော့

သွေ့ခြောက်စွာနဲ့ မျောလွင့်ရတော့မယ်…

ပင်လယ်တစ်ခုကတော့

အခုထိအေးစက်တုန်း…။  ။

 

              နွေသူရ

              ၀၉၊၀၂၊၂၀၀၄

(Final Part II  နောက်ဆုံးနေ့က အမှတ်တရအဖြစ်ရေးဖွဲ့ခဲ့ပါသည်..။)

9 Comments

« Older entries

Follow

Get every new post delivered to your Inbox.